Sjongeres Elske DeWall yn foarstelling Raze om protters
30 09 2019
Sjongeres Elske DeWall leveret in spesjale bydrage oan de foarstelling Raze om protters. Se sjongt ûnder oaren de titelsong ‘Raze om protters’.
Yn de rin fan de foarstelling wurdt hieltyd dúdliker wat de rol is fan Elske DeWall yn it libben fan haadpersonaazje Doede, in rol fan akteur Raymond Muller.
Raze om protters is in foarstelling oer minsken dy’t op ien of oare wize net binnen de maatskiplike noarm falle. Sa’n ien is Doede, in tritichjierrige jonge mei in lichte ferstanlike beheining. Wannear’t Doede foar de safolste kear net begrepen wurdt, komt er yn aksje en easket in poadium, yn de hope dat it publyk nei him lústerje wol. Hy gizelet it publyk en fiert harren mei nei syn belibbingswrâld, dêr’t er ynsjoch biedt yn syn libben en gedachten, syn observaasjes en ynterpretaasjes, dy’t oandwaanlik, grappich, skrinend en soms sels pynlik werkenber binne.
Oare belangrike rollen wurde spile troch Aly Bruinsma as de mem fan Doede, Mads Wittermans yn de rol fan syn casemanager, en dûnseres Olympia Kotopoulos as de bûtenlânske, húshâldlike help.
Yn Raze om protters set regisseur Eelco Venema aktuele, maatskiplike fraachstikken oer soarch, partisipaasje, ynklusiviteit, sinjouwing en iensumheid om yn in tragikomysk skouspul tusken fjouwer spilers, wêrby’t er mei humor en empaty de somtiden skrinende werklikheden oan it ljocht bringt.
De foarstelling wurdt oant en mei 11 desimber spile op mar leafst 39 lokaasjes yn Fryslân en yn stêd Grins: yn doarpshuzen, by bedriuwen en yn skouboargen. Yn de foarstelling wurdt Frysk, Nederlânsk en Ingelsk praat. Foar wa’t wol, is yn de skouboargen in Nederlânske fertaling beskikber. Tiisdei 3 desimber is by de foarstelling yn De Harmonie yn Ljouwert in blinetolk fan Komt het Zien! oanwêzich.
Alle spyllokaasjes en kaarten kinst hjir fine.
