Skriuwer Arne Sierens komt nei Zalen Schaaf
20 03 2019
Op freed 29 maart is nei ôfrin fan de foarstelling Trouwerijen en rjochtsaken, smoarge hoeren, ligers, minne heiten en memmen, ûnnoazele bern, ensafuorthinne en it hâldt mar net op in neipetear mei de Flaamske skriuwer fan it stuk, Arne Sierens, regisseur Tamara Schoppert en akteur Eelco Venema. Sjoernalist Kirsten van Santen sil mei de makkers yn petear oer de ynspiraasje fan Arne Sierens, de taal fan it stik en oer de ynterpretaasje fan Tamara Schoppert.
Arne Sierens (Gent, 1959) is in Flaamske skriuwer en teatermakker. Hy groeide op yn de Brugse Poort, in arbeiderswyk oan de westkant fan Gent. Syn jonge jierren yn dizze folkse wyk hat sûnder mis ynfloed op syn wurk: “In plak dêr’t de ‘condition humaine’ sichtber wurdt. Der wenje gjin goaden, mar ‘sukkelaars’. Sjochst der gjin trageedzjes, mar melodrama”, fertelt Sierens. Syn heit, de betiid stoarne skriuwer en filmresinsint Frans Sierens, joech him de leafde foar literatuer en film mei. Syn artistike en syn folkse achtergrûn komme yn syn foarstellingen by elkoar, wat him as teatermakker in persoanlike en unike styl meijout.
Peter Sijbenga fertaalde it stik fan Sierens nei it Frysk mei in ‘bite’, in fiktyf ‘Folksfrysk’. Fan 26 maart ôf oant en mei 20 april is de foarstelling te sjen, wêrby’t Zalen Schaaf omtsjoend wurdt ta feestseal De Rialto. Tickets foar de foarstelling fynst hjir.
