Op reis troch de backstage fan it teäter, dwers troch de tiid, by de klaaikeamers del en tusken de kostúms troch
Twa minuten foar oanfang is in aventoerlike audiorûte troch de backstage fan it teäter wêrby’st ûnderweis allerhanne personaazjes fan fleis en bloed tsjinkomst. Op de reis belânest op magyske wize yn ‘e holle fan akteur Joop Wittermans, en wa wit komt hy ek noch echt earne foar it ljocht. ‘Hjoed is it foar it lêst, nei 60 jier spyljen hat it genôch west’, hearst him tinken.
Wurdst fuortendaliks werom slingere nei de alderearste kear dat Joop frege waard foar in foarstelling fan Tryater. Dan folget in backstagetrip troch klaaikeamers, technykromtes en kostúmhokken, wêryn’t Joop it paad bjuster rekket yn ‘e tiid. Teksten út it ferline dûke op, ferjitten personaazjes sette de achterfolging yn en bylden út foarstellingen twinge har oan dy op. Sa’t yn dyn holle oantinkens en alles watst meimakkest ek dwers troch elkoar hinne rinne kinne.
Twa minuten foar oanfang is in ferrassende ûnderfiningstrip troch 60 jier Tryater en 60 jier spyljen.
Yn it jubileumjier fertelle we it ferhaal fan 60 jier Tryater mei safolle mooglik minsken fan ferskillende generaasjes. Njonken it fertroude lûd fan Joop Wittermans hearst en sjochst ûnderweis ek akteurs fan Jong Tryater en amateurspilers fan alle leeftiden! Tryater hat Sjoeke-Marije Wallendal – spesjalisearre yn ûnderfiningsteater, bygelyks Marijke Muoi – frege om tegearre mei foarmjouster Geartsje van der Zee in ferrassende rûte út te setten yn ús eigen Tryatergebou en de fiif skouboargen fan Fryslân. Skreaun troch Wessel de Vries mei muzyk fan Peter Sijbenga.
Tagonklikheid
De rûte giet troch (smelle) gongen, treppen en gewoanwei net tagonklike romten yn it teäter en freget om in goede basiskondysje. Bist min op’e gong en/of brûkst in rollator of in rolstoel, dan kinst de rûte meimeitsje op in sneintemiddei yn Theater Sneek, Schouwburg De Harmonie yn Ljouwert of Schouwburg De Lawei yn Drachten. Der is dan in tiidslot wêrby’t gebrûk makke wurdt fan in lift en der is mear tiid om de rûte ôf te lizzen.
Foar bline minsken en minsken dy’t min sjogge is audiodeskripsje beskikber fan 19 septimber ôf.
Mei te meitsjen by Tryater yn Ljouwert, Theater Sneek, Posthuis Theater Heerenveen, De Lawei Drachten, De Harmonie Leeuwarden en De Koornbeurs Frjentsjer. Fan 12 septimber oant en mei 19 oktober op freed – en sneontejûn en sneintemiddei.
Goed om te witten
- Taal: Twa minuten foar oanfang is benammen Frysktalich
- Duer: De rûte duorret likernôch 75 minuten. Reservearrest in tiidslot om te starten. Graach 10 minuten foar it begjin fan dyn tiidslot oanwêzich wêze. Kinst allinnich starte yn it tiidslot dat troch dy reservearre is, net earder en net letter.
- Lûd: Rinst de rûte mei it lûd op in koptelefoan dytst by de start útrikt krigest.
- Audiodeskripsje: Foar bline minsken en minsken dy’t min sjogge is audiodeskripsje beskikber fan 19 septimber ôf.
- Tagonklikens: De rûte giet troch (smelle) gongen, treppen en gewoanwei net tagonklike romten yn it teäter en freget om in goede basiskondysje. Bist min op’e gong en/of brûkst in rollator of in rolstoel, dan kinst de rûte meimeitsje op in sneintemiddei yn Theater Sneek, Schouwburg De Harmonie yn Ljouwert of Schouwburg De Lawei yn Drachten. Der is dan in tiidslot wêrby’t gebrûk makke wurdt fan in lift en der is mear tiid om de rûte ôf te lizzen. Sjoch foar mear ynformaasje op de webside fan it oanbelangjende teäter.
- Tagongsprizen (ynkl. konsumpsje): € 25 (regulier), € 22,- (Freonen fan Tryater), € 19,- (Jong o/m 25 jr)
