Hoe giet Tryater om mei de situaasje fan no?

It coronavirus hat ek ús yn de greep. De kommende wiken wurket Tryater safolle mooglik thús en binne wy telefoanysk net berikber. Hast in fraach oer bestelde kaarten foar ien fan ús foarstellingen, dan kinst maile nei kaarten@tryater.nl. Hast in oare fraach, mail dan nei ynfo@tryater.nl.

Alle foarstellingen fan Trije susters spile troch de Prutsers geane net troch, mar de Prutsers binne kreatyf en fernimstich. Se ha der gjin sin oan om op ‘e bank te sitten. Dêrom geane se alle foarstellingsdagen dat Trije susters spylje soe op Facebook LIVE online! Ien fan de Prutsers sil dan in monolooch, gedachte of ‘wat’ diele. In koart momintsje, elkoar moetsje en in teatrale ûnderfining, mar dan online. Foar de Prutsers in lyts ûndersykje (lês: gegriem), dêr ‘t elkenien LIVE diel fan út meitsje kin. Klik hjir foar mear ynfo en de data en tiden.

Yn maaie steane de foarstellingen fan 1000&1 Nacht op it programma. Fanwegen alle ûnsekerheden fan dizze tiid ha we der foar keazen om fan start te gean mei digitaal repetearen. We geane teksten lêzen, tema’s besprekken, muzyk lústerjen op in digitaal platform. It wurdt in ûntdekkingsreis foar ús allegearre.

Sadree’t der mear bekind wurdt oer ús mooglikheden yn de kommende moannen, dan litte wy dat fansels oan jimme witte.

Yntusken sjogge we nei de mooglikheden om online foarstellingen sjen te litten. De Facebookside fan LF2028 toant mei regelmaat registraasjes fan Tryater, foarstellingen dy’t we yn 2018 en 2019 spilen. En op ‘e webside fan Tryater binne meikoarten foarstellingen fan langer lyn te sjen. Hâld ús webside yn ‘e gaten!

Foar no hoopje wy dat jimme foarsichtich binne en bliuw foaral sûn.