Grutte rol Ivgi&Greben by Under Wetter

By de maitiidsproduksje Under Wetter spilet dûnsselskip Ivgi&Greben in belangrike rol. Net allinne om’t har acht dûnsers dielnimme oan de cast, mar ek om’t it selskip yntinsyf meitinkt oer de foarm. Tatiana Pratley fan Tryater: “We fregen Ivgi&Greben al yn in betiid stadium om te sparren oer beweging yn de foarstelling. Mei de tiid groeide har rol. We sprekke elkoar in soad en it docht bliken dat we elkoar prachtich oanfolje.” Johan Greben: “De sympatike útnûging fan Tryater jout gelegenheid ta in nijsgjirrige útwikseling mei de dissipline teater. Likegoed de realistyske tematyk as it spyljen op in bûtenlokaasje binne nije útdagingen foar Ivgi&Greben, dêr’t we nocht oan hawwe.”

Ivgi&Greben makket yn Under Wetter oansteklike goreografyen dy’t it dûnsjen mei ús allen, as mienskip, fiere. Tink oan it mei-inoar swiere op it iis of útlitten dûnsje op in feest. Dûns en beweging drukke plezier út en meitsje de foarstelling ekstra oantreklik om nei te sjen. De acht dûnsers jeie de oare spilers oan en helpe bepaalde aspekten yn it ferhaal út te fergrutsjen. Lykas krêften út de natuer en gefoelens as fertriet of langstme. Johan Greben: “Dit ekspressive en abstrakte aspekt is in skaaimerk fan ús dûnstaal. Yn de wikselwurking mei it ferhaal, de personaazjes en de lokaasje draacht it by oan de fisuele en emosjonele wurking fan Under Wetter.” 

Greben: “As nijkommer yn de stêd draacht Ivgi&Greben graach by oan it artistike klimaat en dat wurdt fersterke troch útwikseling. It is moai om elkoar persoanlik en artistyk better kennen te learen en dûns te kombinearjen mei teater. De goreografy fan Ivgi&Greben heakket in laach ta oan Under Wetter. We kinne de ûnderstream fan wat der bart sjen litte.”