Fabelkrêft yn Sweden
16 03 2017
Tryater is fan 12 t/m 21 maart op ‘e nij gast yn Sweden, yn de provinsje Västerbottens, om de jeugdfoarstelling Fabelkrêft te spyljen foar bern fan 6 jier ôf. De measte foarstellingen spylje op de basisskoallen.
De bân mei dit gebiet yn Sweden is 2 jier lyn lein, doe’t der kontakt ûntstie yn it ramt fan Umeå Kulturele Haadstêd, wat grutte oanbelanget fergelykber mei Ljouwert. It wie foar Tryater in moaie kâns om yn in oar lân, yn in soartgelike omjouwing, te sjen hoefier’t de (byld)taal fan in teaterfoarstelling universeel wêze kin en hoe’t der troch dy taal ferbining socht wurde kin. De funksje fan de mienskip yn dizze streek is te fergelykjen mei de sitewaasje yn Fryslân en dat makket dat de wize fan wurkjen fan Tryater, tichtby de minsken en harren ferhalen, harren oansprekt. Ek de ekspertize fan Tryater op it mêd fan jeugdteater en edukaasje, wurdt tige wurdearre yn Sweden. Foar Angelica Johansson, kultuerkonsulint fan Umeå, reden om ús op ‘e nij te freegjen om spyljen te kommen. Dizze kear yn totaal 13 kear yn Umeå, Vännäs, Åsele en Vilhelmina. De foarstelling wurdt Ingelstalich spile, mei hjir en dêr Sweedske sinnen.
Regisseur Tamara Schoppert betoch it konsept foar dizze foarstelling: in beweechlike foarstelling, dêr’t de ûnútputlike krêft fan de fantasy it lichem útdaget en se mekoar ûnderling foar de gek hâlde. Prachtige, tsjinoerstelde krêften dy’t belicheme wurde troch Michaël Bloos en Tijs Huys.
De makkers dringe fan de earste minút fan de foarstelling ôf de wrâld fan de bern binnen. De bern balânsearje tidens it sjen allegeduerigen tusken werklikheid en fantasy. Se identifisearje harren mei it krêftige of just mei it fantasyrike personaazje. Dizze stellingname fan it jonge publyk ferriket de tematyk fan de foarstelling. Net foar neat is dizze foarstelling nominearre foar de Zapp Theaterprijs.
It jeugdteater nimt in wichtich plak yn by Tryater: Jierliks sjogge sawat 10.000 bern foarstellingen ús selskip.
Folgje de aventoeren fan Tijs, Michaël en technikus Jan fia de Facebookside fan Tryater.
