Doch mei oan de Masterclass Literêre Performance
29 06 2023
Explore the North, Tryater en Ljouwert UNESCO City of Literature organisearje wer in nije masterclass Literêre Performance, foar skriuwers dy’t harren optredens nei in heger nivo bringe wolle en in stap fierder wolle yn it presintearjen fan harren wurk. De masterclass wurdt jûn troch teatermakker Karel Hermans. Meidwaan is fergees.
De masterclass Literêre Performance is bedoeld foar skriuwers dy’t al proaza of poëzij publisearre hawwe, en (leafst) al wat presintaasje/poadiumûnderfining hawwe. Yn dizze masterclass ferkenst al spyljend de mooglikheden om in tekst oan en foar it publyk oer te bringen. Wille en ferbyldingskrêft steane foarop.
Mei akteur en teatermakker Karel Hermans silst oan ‘e gong mei hâlding, stimgebrûk, ynterpretaasje en teatertechnyk. Dit is it ark foar in goede literêre performer. Kinst wurkje mei eigen teksten – poëzij of proaza, yn hokker taal ast wolst – wêrmei’t jim mei-inoar in foarstelling meitsje oer it tema ‘(ûn)einigens’. Nei de fiif masterclasses en in try-out jouwe wy op it Explore the North festival in mienskiplike foarstelling oan it publyk op festival Explore the North op 24, 25, 26 novimber. Hâld dizze data dus frij yn de aginda!
De masterclasses binne op tiisdeitejûn fan 19.00 oant 22.00 oere; op 3, 17 en 31 oktober by Tryater en op 7 en 14 novimber yn de Kapel fan dbieb. De try-out fan jim mienskiplike foarstelling is dêr woansdei 15 novimber en yn it wykein fan 24-26 novimber spylje jim de foarstelling twa kear op festival Explore the North.
Der is plak foar maksimaal seis dielnimmers. Meidwaan is fergees en wurdt oanbean troch Tryater, Explore the North en Ljouwert UNESCO City of Literature. Mei dit formulier kinst dy oant en mei tongersdei 31 augustus 2023 ynskriuwe.
Wy meitsje in seleksje op basis fan de oanmeldingen en litte yn de wike fan 4 septimber witte oftst meidwaan kinst. Ast selektearre binst, ferwachtsje wy datst meidochst oan alle gearkomsten en optredens. We freegje dy ek om foar’t de masterclass úteinset in eigen tekst te skriuwen/út te sykjen dy’t te krijen hat mei it tema (ûn)einigens, om yn de masterclass mei te wurkjen.
Wolst earst mear ynformaasje? Nim dan kontakt op mei Tryntsje van der Steege, projektkoördinator by Ljouwert UNESCO City of Literature, tryntsje@leeuwardencityofliterature.nl.
~ Foto: Lucas Kemper
