Under wetter by Arcadia
07 05 2021
By keunst- en kultuermanifestaasje Arcadia (maitiid/simmer 2022) bringt Tryater de foarstelling Under Wetter. Under Wetter giet oer de iisbanen dy’t rûnom yn Fryslân binne, mar dy’t troch klimaatferoaring har funksje driigje te ferliezen.
Wêr’t it hiele doarp yn kâldere tiden byinoar kaam, is de iisbaan no it grutste lege plak fan it doarp. Dochs funksjonearret de ynfrastruktuer by de iisbaan yn elk lyts doarp noch: de baan wurdt kreas ûnderhâlden en elk jier betelje de ynwenners lidmaatskipsjild. Tatiana Pratley: “De iisbaan is foar in soad minsken in bysûnder plak, mei dierbere oantinkens.” Mei Under Wetter, dêr’t se de regy fan docht, blaast Pratley libben yn dit eardere moetingsplak en stelt de ûnûntkombere fraach: ‘hoe no fierder?’ In foarstelling oer identiteitsbelibbing yn in almar feroarjende wrâld. Mei en foar de Fryske mienskip.
Programmaline IIS
Under Wetter makket diel út fan de programmaline IIS fan Arcadia, dêr’t meardere projekten ûnder falle wêrby’t keunstners mei de mienskip sykje nei nije wizen fan mei-inoar ferbûn wêze. Arcadia is in 100 dagen duorjende keunst- en kultuermanifestaasje as ferfolch op Leeuwarden-Fryslân Kulturele Haadstêd fan Europa 2018. Arcadia is om de trije jier mei in earste edysje yn 2022.
