Tryater bringt foarstelling fol sinteklazen

Ljouwert, 31 oktober 2022 – Fan tongersdei 9 novimber ôf stiet it gebou fan Tryater in moanne yn it ramt fan Sinteklaas. It selskip bringt yn dy perioade Sintgelok, geskikt foar elkenien dy’t net mear yn de Sint leaut. Teatermakker en akteur Karel Hermans hat in goed jier ûndersyk dien nei de iuwenâlde tradysje fan goed dwaan, in goedhillichman wêze. It resultaat is in fleurige, meartalige show dêr’t in hiele rige helpsinteklazen delkomt. Dizze rollen wurde spile troch likegoed rotten yn it sintfak, wêrûnder Sint Piter, as troch opkommende talinten fan D’Drive, wêrûnder Rowan Veltman.

Karel Hermans hat in fassinaasje foar it ûnderwerp: “Al in skoft rin ik om mei it idee om in foarstelling te meitsjen oer Sinteklaas. Wat is it dochs dat in grut part fan Nederlân in moanne yn it jier yn de ban fan de Sint is? Doe’t ik yn de skiednis fan de fiering dûkte, kaam ik derachter dat it in tradysje is dy’t him hieltyd oanpast hat oan de tiidgeast. Fan Sinteklaas út Mira oant de Sint fan de takomst.” Yn de úteinlike foarstelling fol helpsinten út alle wynstreken spylje ûnder mear Leòn Ali Çifteci (bekend fan û.o. Flikken Maastricht en Tweede Hans) en Rowan Veltman (resinte dielnimmer Holland’s Got Talent).

It gelok fan Fryslân

Sintgelok makket diel út fan It gelok fan Fryslân. Yn dit fjouwerjierrige projekt fan Tryater ûndersykje teatermakers Karel Hermans en Aukje Schaafsma hoe’t it kin dat yn Fryslân de gelokkichste minsken fan Nederlân wenje. Nei it langste geloksgedicht oait yn tsien doarpen yn 2020-2021 en de audio-ynstallaasje Snackgelok oer it gelok fan konsumearje, dûke se no yn it sinteklaasfeest as in soarte fan ritualisearre ferzje fan gelok.

Pop-up restaurant

De foyer fan Tryater wurdt yn de spylperioade omboud ta pop-up restaurant. Marije Lamsma fan Kookpit makket hjir in fegetarysk diner fan twa gongen. Kookpit is ûnder mear bekend fan de mobile krêpery Cut the Crêpe dy’t op festivals as Welcome to the Village, Festival der Aa en Noorderzon stiet.

Sintgelok hat try-outs op woansdei 9 en tongersdei 10 novimber en giet op sneon 12 novimber yn premjêre. De foarstelling spilet oant en mei 3 desimber. Der is in koartingspriis foar studinten/jongeren. Mear ynformaasje en kaarten