Tryater lansearret podcast op atletykbaan

Hurddrave mei Foekje no online

Tiisdei 11 maart lansearren wy mei in echte sportparsekonferinsje de podcast Hurddrave mei Foekje. De trijedielige searje is in mjuks fan djipte-ynterviews mei in motivearjende hurdloopapp, en giet foarôf oan de foarstelling Foekje oer de postúm priizge topatlete Foekje Dillema.

Sportparsekonferinsje op atletykbaan
Midden op de read-wite baan fan atletykferiening Lionitas yn Ljouwert, dêr’t de Boerumse atlete Foekje Dillema yn de jierren’40 ek treende oant har karriêre ophâlde fanwege in wegere seksetest, hold Tryater in parsekonferinsje. Hjiryn joech Foekje-regisseur Jos van Kan tegearre mei de akteurs de oanwêzige parse útlis oer de foarstelling en it ûnderwerp. Dêrneist spruts Anne Jochum de Vries, direkteur fan Sport Fryslân, oer it belang fan ynklusy yn de sport en Yke Schouwstra, earste trainer fan Olympysk atlete Sifan Hassan oer de parallellen én ferskillen tusken Hassan en Dillema. Maaike Prins kaam as wethâlder Sport fan gemeente Noardeast-Fryslân fertellen oer hoe’t it ferhaal fan Dillema yn har regio neiwurket. De cast, al op de baan oanwêzich fanwege in hurdrincoaching troch Rutger Wagenaar, joech in lyts foarpriuwke út it meartalige en muzikale stik.

Hurddrave mei Foekje
Ofslutend waard, mei in hurdrinsesje troch akteur Lourens van den Akker, de trijedielige podcast Hurddrave mei Foekje lansearre. De podcast is makke om ferdjipping te bieden by de foarstelling én om it publyk op te waarmjen foar it sportive karakter derfan. De rige is nammentlik in mingeling fan ynterviews mei eksperts en in flotte, motivearjende hurdloopapp yn de styl fan it populêre Hardlopen met Evy. De ynterviewde eksperts binne trener Henk Kraaijenhof, sjoernalist Danielle Pinedo, aktrise en fjochtsporter Jaike Belfor, yntersekse persoan Ella Witjes dy’t har foar seksediversiteit ynset by stichting NNNID en Agnes Elling fan it Pim Mulier Instituut. De luchtich montearre mar djipgeande petearen geane oer gelikensens yn de sport en yn de maatskippij, ferskillen tusken geslachten, diversiteit en útsletten wurde; yn histoarysk en yn hjoeddeisk perspektyf. Leafhawwers kinne de podcast dravend beharkje, mar it mei ek út de luie stoel wei.

Foekje Run
Op sneon 12 april, ien dei nei de premjêre yn Ljouwert, is yn it bertedoarp fan Foekje Dillema de Foekje Run. Boerum is op it stuit drok dwaande it doarp ynklusyf monumint foar Dillema oan te passen op it evenemint; ek wurde der Foekje Koekjes bakt en binne bewenners op oare wizen yn de ban fan harren âlde doarpsgenoat.