Wolkom by Uit in Huis
27 07 2023
Sneon 9 septimber iepenje de kulturele ynstellingen yn Ljouwert it nije seizoen mei it evenemint Uit in Huis. Fansels docht Tryater mei! Tusken 12.00 en 16.00 oere organisearje we ferskillende fergees tagonklike aktiviteiten.
Sjoch hoe’t we hjoeddedei oan teäter wurkje mar rin ek troch de skiednis fan de Vijverschool út 1883. De leafhawwer kin mei op in rûnlieding troch it gebou, dy’t we organisearje tegearre mei ús buorlju fan JTS Meeuw. Fierder: Bern kinne mei har âlden en pakes en beppes in teatrale miny-safary meitsje nei in beam yn de buert. It is in ynsjoch yn de 6+-skoalfoarstelling De Eik was hier, dy’t sûnt april op basisskoallen spilet. Dêrneist komst as besiker yn de kunde mei it Fanfare-trijelûk, de foarstellingsrigen oer de fanfarekultuer dêr’t we ús it kommend seizoen op stoarte. Ek kinst by Uit in Huis plaknimme yn in libbensgrut patatbakje: Snackgelok. In audio-ynstallaasje dêrst ferhalen oer konsumearjen hearst. De bakjes stiene al op Oerol, Welcome to the Village, Karavaan en oare festivals.
Programma 9 septimber
| 12.00 oant 16.00 oere | Doarren iepen, Oostersingel 70 |
| Trochrinnend | Ynstallaasje Snackgelok en doch-aktiviteit foar bern |
| 13.00 en 14.00 oere | Rûnlieding troch it gebou y.g.m. JTS Meeuw. Start by Meeuw |
| 13.30 en 14.30 oere | Safary De Eik was hier |
| 15.00 oere | Foarpriuwke Fanfare, seizoenspresintaasje |
Oer Uit in Huis
By Uit in Huis sette kulturele ynstellingen yn Ljouwert de doar iepen om dy te fertellen oer har programma foar de kommende tiid, of om it dy sjen, hearre of belibje te litten!
