Weromsjen op it Iepeningswykein fan Ljouwert-Fryslân Kulturele Haadstêd 2018
30 01 2018
Oardeljier lyn is der in begjin makke mei de organisaasje fan it Iepeningwykein fan Ljouwert-Fryslân Kulturele Haadstêd 2018. Yn al dy tiid waarden hieltyd mear minsken belutsen by de organisaasje en it meidwaan oan dit wykein. Snein 28 jannewaris wie it foarby. We ha in machtich oantinken.
Besjoch hjir de aftermovie fan it Iepeningswykein
2018ferhalen
Freed 26 jannewaris songen mear as 1500 bern op de basisskoallen it ferske Seis oere thús fan Nynke Laverman. Jûns wiene der troch hiel Fryslân mear as 20.000 minsken op paad om te lústerjen nei ferhalen. Op guon plakken waarden de lokaasjes oerspield mei besikers. Fan Skylge oant Riis en fan Koarnwertersan oant Surhústerfean; der wiene in soad entûsjaste lûden te hearren.
De Iepening
Sneon 27 jannewaris sette middeis útein mei de keunsten fan de Ljouwerter bern. Oan belangstelling gjin gebrek! It wie de earste fan sa’n 60 previews dy’ t fan 19.00 oere ôf te sjen wiene yn de binnestêd. Fan dat momint ôf rûn de stêd hielendal fol.
De oanfang wie om 21.46 oere, nei’t de televyzje grien ljocht jûn hie. Sa’n 40.000 minsken stiene yn it sintrum, benammen op de trije pleinen, om it mei te meitsjen. It wie in fantastyske, yndrukwekkende live-underfining. Sa folle meiwurkers, sa folle technyk, sa folle eagen op ús rjochte. De foto’s sprekke foar himsels.
