Weromsjen op it Gouden Wykein by Tryater

Op 18, 19 en 20 oktober spilen amateurspilers yn it Gouden Wykein foar in folle kaart.

Yn de workshop fan Olaf Pieters learden se mear oer elemintêr spul út de fjouwer eleminten wei. In technyk dy’t ûntwikkele is troch Helmert Woudenberg. Der kamen fjouwer stuollen op it toaniel en Olaf liet hiel helder sjen hoe’t dyn personaazje út fjoer, wetter, loft & ierde wei reagearret. It tapasse en skeakelje kinnen fan it iene nei it oare elemint – en de lagen dy’t dan ûntstean – wie in moaie ferdjipping.

Yn it wykein lieten Tamara Schoppert, Fabian Jansen en Arthur Pirenne sjen datst saken op ferskate manieren oanpakke kinst. Wêr’t Fabian ekstra repetysjedagen ynplant om yn de skiednis fan syn rol te dûken, ûndersiket Tamara foaral de situaasje dêr’t har personaazje yn sit. Arthur liet de dielnimmers, út syn praktykûnderfining as clown wei, har fysyk ferkenne. In folslein oare oanpak. Ut dyn holle en yn dyn liif.

Sneintemiddei hawwe alle spilers BINGO! ûlf Tine spile. Se waarden útdage om ûnder it hiele spul yn de rol te bliuwen en út har personaazje wei te reagearjen op alles dat ûntstie. In grutte ymprovisaasjebingoshow! Spannend, útdaagjend, learsum en in unyk konsept. Mei tank oan Tamara dy’t alles, al ymprovisearjend, yn goede ‘rigen’ wist te lieden.

Tryater hopet mei it organisearjen fan dizze Rûnom-aktiviteit, ferdjipping biede te kinnen en in plak te wêzen dêr’t spilers elkoar moetsje en útwikselje kinne.

Foto’s: Lucas Kemper