Útnûging (muzyk)aktiviteit foar minsken mei in fisuele beheining
31 03 2022
Tryater wurket gear mei de stifting Komt Het Zien! om minsken mei in fisuele beheining de mooglikheid te jaan fan teaterfoarstellingen te genietsjen. Foar Under Wetter, ús grutte lokaasjefoarstelling op de iisbaan yn Wergea, wolle we elkenien dy’t blyn is of net goed sjen kin in totaalûnderfining jaan. Op moandei 11 april fan 15.00 tot 16.30 oere is dêrom de mooglikheid om meinommen te wurden achter de skermen by de tariedingen fan Under Wetter yn it gebou fan Tryater (Oostersingel 70 yn Ljouwert). Op sneon 2 july is der in blinetolk fan Komt Het Zien! oanwêzich by de foarstelling fan Under Wetter yn Wergea. De foarstelling wurdt foarsjoen fan live-audiodeskripsje. Foardat de foarstelling úteinset is der romte foar in meet en feel mei de akteurs op de lokaasje.
Op 11 april sille we fertelle oer ús selskip en oer Under Wetter. Komt Het Zien! is oanwezich om ynformaasje te jaan oer de aktiviteiten fan harren organisaasje. Ien fan ús teatermakkers elkenien mei foar in rûnlieding troch ús histoaryske pand. Dêrnei slute we ôf mei in eksklusive besite oan de (muzyk)repetysjes fan Under Wetter.
Wolst der graach by wêze? Of kenst ien dy’t dit graach bywenje wol? Fertel it troch en kom tegearre! It programma op 11 april is fergees tagongklik en hoecht net beslist yn kombinaasje mei foarstellingsbesite. Oanmelde foar it programma op 11 april kin troch in mail te stjoeren nei Hilly Kronemeijer: h.kronemeijer@tryater.nl. Foar de foarstelling Under Wetter op 2 july kinst op dizze webside in kaartsje keapje. Kies dan foar de kaartsoart ‘Komt Het Zien!(blindentolk)’.
