Elkenien hat langstme nei in fertroud plak; in eigen romte dy’tst thús neame meist. Tagelyk hawwe we ek ferlet fan ferbining, fan mienskip, fan buorlju dy’t we groetsje. Dy twa passe net altyd goed by elkoar. Hoe wolle we libje en foaral: mei elkoar libje? Dêr giet de lokaasjefoarstelling Romte oer.
Yn dizze komyske en krityske sitcom reizgest mei fjouwer personaazjes troch de tiid. Mei har belibbest (of belibbest op ’e nij) de wenningneed yn de jierren ‘50, de útwrydske wenideeën fan de jierren ‘70 en de yndividualisearring yn de jierren ‘90. Om úteinlik yn it no te kommen, dêr’t in nije wenkrisis him oantsjinnet. Fine de fjouwer dé wenfoarm fan moarn?
It meartalige en muzikale Romte spilet fan oktober 2022 ôf op ferskillende lokaasjes yn Fryslân dy’t in link ha mei it tema wenjen. Wy binne te gast by de Friso Bouwgroep yn Snits en yn Ljouwert, oannimmersbedriuw Bangma yn Sint Nyk, de oplieding Bouw en Infra fan ROC Friese Poort yn Drachten, doarrenleveransier Van Vuuren yn Grou, Bakker Konstruktiewerken yn Warkum, Bouwbedrijf Van Dijk yn Surhústerfean, Jorritsma Bouw yn Boalsert, Siderius Heftrucks yn Ljouwert, Noord Nederlandse Draadindustrie yn Dokkum, Spruyt Waterwoningen op It Hearrenfean, Bouwbedrijf Van Marrum yn Frjentsjer en Mensonides Installatie yn Harns.
- Oanfang: 20.00 oere
- Tagongsprizen: € 17,50 (regulier), € 15,50 (Freonen fan Tryater), € 12,50 (o/m 18 jr/studinten)
- Spyllist: Klik foar de folsleine spyllist op ‘Bestel kaarten’ rjochtsboppe-oan dizze side
- Goed om te witten
- Romte is geskikt foar elkenien fan 12 jier en âlder
- Der wurdt sawol Frysk as Nederlânsk sprutsen yn Romte
- Nederlandse ondertiteling beschikbaar via smartglasses. Kies het ticket met smartglasses (ENG/NL)
- English subtitles available (smartglasses). Choose the ticket with smartglasses (ENG/NL)
- Romte is rolstoeltagonklik. Bestel dan in rolstoelplak
- Rolstoeltoilet oanwêzich: 19 o/m 21 oktober by de ROC Friese Poort yn Drachten, 11 en 12 novimber by Siderius Heftrucks yn Ljouwert, 25 en 26 novimber by Friso Houkesloot yn Snits en 30 novimber o/m 3 desimber by Spruyt Waterwoningen op it Hearrenfean
- Op sneon 12 novimber is der in blinetolk fan Komt het Zien oanwêzich. Wolst hjir gebrûk fan meitsje, bestel dan in Komt het Zien! plak
Fotografy: Bas de Brouwer
