Fiergeande gearwurking Tryater, Skoft&Skiep en Meeuw jonge teatermakkers op it mêd fan jong talint

Yn de gearwurking dy’t Meeuw jonge teatermakkers oan de iene kant en Tryater en Skoft&Skiep oan de oare kant dit foarjier oangeane wurdt it jonge teatertalint sintraal set. Elke organisaasje wurket út eigen krêft wei. Tryater is skatplichtich oan Meeuw jonge teatermakkers: Twa fan de trije teatermakkers fan Skoft&Skiep (Tatiana Pratley en Aukje Schaafsma) binne dêr begûn. Dêrneist ha alle trije (ek Karel Hermans) in talintûntwikkelingstrajekt folge by Tryater en nimme se op har beurt ferantwurdlikheid foar de folgjende jonge generaasje.

Mei de gearwurking ûntstiet romte om jongeren fan Meeuw yn it lêste jier fan har lessen te casten foar produksjes fan Tryater en Skoft&Skiep. Foar de jongeren is it in belangryk gegeven om de praktyk fan it teaterbedriuw te ûnderfinen. Mei elkoar giet it dit jier om tsien jonge spilers. Se spylje yn Hjir ha ik west fan Tryater (regy Aukje Schaafsma), te sjen yn Jannum, en yn Part-Time Paradise, in ko-produksje fan Skoft&Skiep en Tryater (regissearre troch Tatiana Pratley), te sjen op Oerol, Simmerdeis en oare festivals.

Neist de 10 jongeren yn de boppeneamde produksjes is foar ien jonge spiler in grutte rol weilein. Hy spilet it jongste personaazje yn de foarstelling Trouwfeesten en processen, vuile hoeren, bedriegers, slechte ouders, domme kinders, enzovoorts tot in het einde der tijden, in foarstelling dy’t yn de maitiid op lokaasje yn Ljouwert spilet, regissearre troch Tamara Schoppert.

Tryater fynt it belangryk om in plak te wêzen dêr’t ûntwikkelingen plakfine dêr’t it kulturele klimaat yn Fryslân en de noardlike regio baat by hat. Talintûntwikkeling is dêr in belangryk ûnderdiel fan.

Meeuw jonge teatermakkers is it plak foar jongeren om har talinten op teatermêd te ûntwikkeljen. In soad fan de learlingen geane fierder mei har oplieding oan de toanielakademys en keunsthegeskoallen. Troch op dizze wize gear te wurkjen, meitsje de jonge spilers mei hoe’t it is om yn in foarstelling fan in selskip te spyljen dat diel útmakket fan de lanlike Basisinfrastructuur.

Skoft&Skiep hat him as jong profesjoneel kollektyf de ôfrûne jierren spesjalisearre  yn it wurkjen mei minsken dy’t net fanselssprekkend op in poadium steane, wêrby’t jongeren in belangryk plak ynnimme. Sa foarmet Skoft&Skiep as teaterorganisaasje in binende faktor yn dizze gearwurking.

Jonge keunstners bine oan de regio: dat is in belangrike beliedsline fan Tryater, Skoft&Skiep en Meeuw. Dizze gearwurking is dêryn hiel weardefol neffens de trije partijen.