Earste foarstelling Foekje útferkocht!

Foekje Dillema’s berteplak Boerum as earste fol

De earste útferkochte Foekje is in feit. De cast stiet op tiisdei 15 april foar in útferkochte seal yn Boerum, it berteplak fan Foekje Dillema. Tryater bringt de foarstelling oer de Fryske atletykleginde tritich kear lâns Fryske gymsealen. ‘Dat it yn har eigen doarp sa oanlûkt, jout oan dat dit tragyske sportferhaal yn de mienskip ferankere is.’

Besikers út de regio dy’t neist in kaart foar Boerum gripe, kinne yn ûnder oaren Kollum, Wâlterswâld en Rinsumageast telâne. Foar de sportive en muzikale foarstelling, regissearre troch Jos van Kan en skreaun troch Kees Roorda, binne yn hiel Fryslân gymsealen fûn, dy’t Tryater omtsjoent ta in teäterseal. De premjêre is yn Ljouwert, de stêd dêr’t Dillema treende. Foekje einiget de toer op Skylge, wêr’t it ûnderdiel is fan it Oerol Festival.

Foekje jout troch de eagen fan útienrinnende personaazjes (brocht troch Nynke Heeg, Lourens van den Akker, Stijn Schootstra en Caroline Mgata) meardere perspektiven op it ferhaal fan Dillema, de Boerumse dy’t yn de foarige ieu út it neat wei in topatlete waard mar har prille karriêre yn 1950 einigje moast nei twifels oer har geslacht. Artistyk lieder Tatiana Pratley fan Tryater: ‘It is in yntrigearjende skiednis, dêr’t we ek hjoed noch frisse fragen by stelle kinne. Hoe siet dit krekt? Wêrom dy twivels oer wa’t se wie en oft se meidwaan mocht? Wie it earlik of waard der in spultsje spile? We besykje yn it stik har ferhaal út te plûzjen, troch de bril fan doe mar ek dy fan no. Foekje Dillema is in wichtige namme yn Fryslân, dêr’t in bysûnder en globaal ferhaal oan hinget. Dat har eigen Boerum no al fol sit, fielt goed. Want dan wurdt sy noch altyd drûgen.’

Tryater sechtich jier
Foekje is de earste grutte foarstelling yn it jubileumjier fan Tryater, dat yn 2025 sechtich jier bestiet. Yn it kommende teäterseizoen wurdt wiidweidich oandacht bestege oan dit jubileum: ûnder oaren mei in boek, in spesjale foarstelling, in unike gearwurking mei it amateurfjild en mear.