Aukje hat har heity fûn foar foarstelling Part-Time Paradise

Foar in rol yn de Oerolfoarstelling Part-Time Paradise, in koproduksje fan teaterkollektyf SKOFT&SKIEP en Tryater, sochten wy in heit foar Aukje Schaafsma, dy’t yn de foarstelling de rol fan ‘Kirsten’ spilet. Nei in oprop op sosjale media, dêr’t mar leafst 40 reaksjes op kamen, is/binne dy fûn! Harry Bos en Epko Dalstra sille stilswijend skitterje as de heit fan Kirsten yn Part-Time Paradise op it Oerolfestival.

Part-Time Paradise is in unike campingfoarstelling wêrby’t it publyk fanút in kolossaal observatoarium fan tritich meter breed en acht meter heech taskôger is fan in miny-maatskippij op de camping. Sjochst del op de camping en folgest tusken de echte kampearders yn de libbens fan tolve personaazjes dy’t allegearre op har eigen wize, mei har eigen bagaazje, op ’e nij begjinne. De foarstelling is te sjen op camping De Kooi wilens it Oerolfestival fan 14 oant en mei 23 juny. De try-outs binne op 31 maaie, 1 en 2 juny te sjen op citycamping De Wetterpôlle yn Ljouwert. Mear ynformaasje en tickets foar de foarstelling fynst hjir.