Tryater docht mei oan Kapsalon Theater
17 01 2022
Op woansdei 19 jannewaris wurde teaters yn hiel Nederlân foar ien kear omboud ta kapsalon.
En wachtsje by de kapper hat noch noait sa leuk west! Nei it meitsjen fan in ôfspraak kinst mei mûlkapke en jildich coronatagongsbewiis ek yn it teater fan Tryater terjochte foar in nije coupe, in pedikuere of in fris neillakje. Yntusken kinst sjen nei optredens fan de folgjende akteurs: Joop Wittermans, Marjolein Ley, Aukje Schaafsma, Eva Meijering, Bart Harder en Eline de Vries.
Kapsalon Theater is in inisjatyf fan Sanne Wallis de Vries en Diederik Ebbinge. Nei twa jier coronabelied moatte wy spitigernôch konkludearje dat de kulturele sektor – tegearre mei de hoareka en it nachtlibben – hieltyd it bern fan de rekken is. Wy binne bliid dat wy mei dizze ienmalige aksje in wize fûn hawwe om op in ludike wize én neffens de jildende regels, de oandacht te festigjen op de knipende situaasje yn de kulturele sektor.
Kapsalon Tryater
Kapsalon Tryater is woansdei 19 jannewaris iepene tusken 15.00 en 17.00 oere. Alle healoeren start in nije ronde mei behannelingen ynklusyf teater. Kinst dyn knip/fersoarchbeurt online reserveare. De tagong is fergees, wol kinst by it fuortgean in frijwillige donaasje dwaan. Foar tagong is neist in ticket in jildich coronatagongsbewiis nedich. Binnen ús gebou jilde de hjoeddeistige corona-maatregels lykas it mûlkapke, 1,5 meter ôfstân en in fêst sitplak.
Boek no dyn plak
Kappers/neilstylisten/skjintmespesjalisten socht!
Op dit stuit hawwe wy trije kappers en in pedikuere boeke kinnen. Wolsto ek helpe? Dat is top! Dan kinne we de kapasiteit fan ús ienmalige ‘salon’ útwreidzje. Nim by belangstelling sa gau mooglik kontakt op.
Mear oer it inisjatyf
De kultuersektor hat him altyd fleksibel, soarchfâldich en mei ynlibbingsfermogen ta it Coronabelied opsteld. Ut ûndersyk hat bliken dien dat der ûnder de iepenstelling amper besmettings yn de teaters sjoen binne. It tekoart oan perspektyf en de koarte termyn-kommunikaasje binne foar de kulturele sektor ûnwurkber. Foar it iepenstellen fan teaters is tarieding nedich. Dit kin net op stel en sprong nei in ‘weegmoment’.
Oan Kapsalon Theater dogge grutte en lytse teaters yn hiel Nederlân mei. Lanlik dogge spilers en makkers mei as Youp van ‘t Hek, Bert Visser, Roué Verveer, Claudia de Breij, Dirk Scheele, Yentl en de Boer, Theo Maassen en Ed Struijlaart.
