Fergees op 'e kofje by Joast Halbertsma yn Grou!
17 10 2018
Sneontejûn 20 en sneintemiddei 21 oktober komt Tryater mei Doarp Europa nei Grou by houtfabryk Van Vuuren B.V.., ek wol bekend as the âlde Halbertsma fabryk.
Net allinne yn Grou en omkriten, mar yn hiel Fryslân is de namme Halbertsma ferneamd en dat yn’t bysûnder omdat Eeltsje Halbertsma de skriuwer is fan it Frysk Folksliet. Ek syn bruorren Tjalling en Joast wiene skriuwers. De fjierde broer, Binnert, wie bakker, mar boppedat keapman. Syn neiteam stifte en behearde jierrenlang it bekende ‘houtsjefabryk’, de Halbertsma fabryk, dêr’t in protte minsken út Grou en omkriten wurk fûnen.
De bruorren Halbertsma en benammen Joast Halbertsma ha in protte troch Europa reizge op syk nei âldheden en kulturele tradysjes. Joast’s ‘Kabinet fan âldheden’ wie eins it begjin fan wat no it Frysk Museum is. Museum ‘Hert fan Fryslân’ yn Grou hat dit jier in spesjale eksposysje wijde oan dizze ‘Wrâldboarger út Grou’. Jo kinne dêr û.o. syn studearkeamer efkes sjen en syn nijsgjirrige reizen troch Europa.
It museum jout de besikers fan Doarp Europa op fertoan fan harren kaartsje (fan sneon of fan snein) op dy beide dagen fergees in rûnlieding mei dêrby in kopke kofje of tee mei ‘Dimter koeke’. Dit om’t Joast Halbertma lange tiid dûmny wie yn Dimter (Deventer) en gek wie op Dimter koeke.
Lit jo ynspirearje troch de wrâldboarger Joast Halbertsma en syn kabinet fan âldheden! Kofje en koeke stean foar jo klear fan healwei 11 oant healwei 1 oere. Kom del en sko oan!
Kaarten foar de foarstelling in Grou op sneon 20 oktober 20:00u of snein 21 oktober 15:00u binne te keap fia dizze pagina.
