Weromsjen: ynlieding Foekje yn Kollum

Op 21 maaie wie foarôfgeand oan Foekje in ynlieding yn Kollum. Kees Roorda, de skriuwer fan it stik, dielde by de gearkomste it ferhaal achter de foarstelling en lei út wêrom’t it foar him fan grut belang wie om krekt dizze foarstelling oer Foekje Dillema te meitsjen.

Kees fertelde it publyk hoe’t it idee foar de foarstelling ûntstie. By in fytstocht troch de Fryske Wâlden yn de koroanaperioade foel syn each op it monumint fan Foekje Dillema by it satellytpaad yn Boerum. It ferhaal fan Foekje rekke him, benammen it ûnrjocht dat har oandien wie en alle fragen oer wat se trochstean moast. Dat ynspirearre Kees om by Tryater oan te klopjen mei it foarstel om in foarstelling oer har te meitsjen, krekt yn Fryslân. En sa barde it. Tryater omearme it idee en mei Kees en regisseur Jos van Kan waard it artistike proses op gong brocht.

Ek Yke Bremer en Pieter Anko de Vries wienen oanwêzich. Beide wienen doarpsgenoaten fan Foekje Dillema en hienen gymles fan har hân. Sy dielden har oantinkens oan Foekje, lykas har karakteristike wize fan lesjaan. “We moasten altyd marsjearje op de maat en as se dy by de earm pakte, koe se soms krekt wat te hurd knipe. As bern wisten we dat we by Foekje absolút net ‘belletje lellen’ moasten, omdat we wisten dat se hurd drave koe,” fertelden se. Ek joegen se oan dat Foekje foar bern fanselssprekkend wie: Foekje wie gewoan Foekje. Pas letter, doe’t se âlder wienen, beseften se wat Foekje allegearre meimakke hie, mar dêr waard har destiids noait nei frege.

By de ynlieding waarden ek oantinkens út it publyk dield, lykas gedachten oer it ûnrjocht dat Foekje oandien wie. It wie in slagge ynlieding dy’t de jûn goed begûn.