Weromsjen searje workshops IKC Aventurijn
28 06 2023
Yn de moanne april hawwe de groepen 5/6 en 7/8 fan IKC De Aventurijn út Ljouwert by ús op besite west foar in searje teäterworkshops. Mei teäterdosint Luna van Drunen hawwe se yn trije byienkomsten sênes makke oer tiidreizgje. Op 20 april hawwe se dy as ôfsluting fan har projekt presintearre foar har âlden en pakes en beppes.
Dizze searje workshops wie in pilot foar it lanlike trijejierrige programma ‘School en Omgeving’. Op in soad plakken yn Nederlân wurkje skoallen en lokale partijen al nau gear oan in bûtenskoalsk oanbod op en by skoalle. Dat binne aktiviteiten wêrmei’t bern en jongeren útfine wêr’t se allegear goed yn binne, leare op harsels te bouwen en de wrâld te ûntdekken.
Ljouwert docht yn in foarrinnerstrajekt mei skoallen yn Ljouwert East mei. It doel is om gelikense kânsen ûnder bern te realisearjen. De bern, dosinten en âlden (en pakes en beppes) reagearren nei ôfrin fan de presintaasjes hiel entûsjast. In soad learlingen hienen sels noch net earder by ús yn it gebou west.
Foto’s: Lucas Kemper
