Tryater ûntfangt subsydzje Provinsje Fryslân

Op freedtemoarn 4 july waard bekend hoe’t provinsje Fryslân it subsydzje oan kulturele ynstellingen foar de perioade 2026-2028 ferdielt. Fryslân brûst fan de plannen: der wie troch allerhanne partijen oanfrege. Yn ‘e moarn koene oanfregers dy’t neat of minder krigen skille wurde, wêrmei’t hiel kultureel ûndernimmend Fryslân oan ‘e telefoan fêst siet.

Wy kinne wilens sizze dat ús plan foar de oankommende tiid by de provinsje goed oankaam en we hiel bêst fierder bouwe kinne op wat Tryater yn de ôfrûne sechtich jier delsette. Hjirmei sjogge wy ús jubileumseizoen, dat nei de simmer begjint, fol betrouwen yn ‘e mjitte. We binne tankber en fiele ús sjoen troch de hast 100% skoare en de positive beoardieling:

‘De commissie beoordeelt de artistieke kwaliteit als uitmuntend. De “Tryatermethode” heeft veel navolgers opgeleverd in Fryslân en verdient complimenten. Het is zeldzaam hoe uitgebalanceerd het werk van Tryater is. Tryater werkt in een lange traditie en dat doen ze prachtig. Hoge kwaliteit blijkt al meer dan twintig jaar een constante te zijn.’

We lokwinskje ús kollega’s dy’t likegoed in posityf berjocht krigen fan herten.

Tagelyk libje we mei, mei ús kollega’s dy’t har no op ‘e nij skikke moatte om harren publyk te betsjinjen. Mei-inoar meitsje we in moai en sterk kultureel Fryslân, nettsjinsteande no en dan grutte útdagingen, en hâlde dêrby mei elkoar de kulturele kwaliteit en leefberens heech.