Tryater laadt him op foar nij teäterseizoen
18 07 2024![](https://tryater.frl/wp-content/uploads/2024/03/Salt-Bart-Grietens-44-1-1920x1280.jpg)
Tryater slút teäterseizoen 2023-2024 op 19 july ôf mei de ôfrûning fan it suksesfolle, suver útferkochte Fanfare en lûkt syn doarren ticht foar de simmer. Om fan ein augustus ôf hurd te wurkjen oan yn it folgjende seizoen, yn septimber te begjinnen mei de reprize fan Sâlt yn Alde Leie. Yn 2023 wie it in hit op it Oerol Festival.
Nij publyk
De grutte lokaasjefoarstelling Fanfare fan maaie-juny wie de hekkesluter fan Tryaters trijelûk oer de Fryske fanfarekultuer, dat mei útferkochte foarstellings op korpsrepetysjelokaasjes, yn húskeamers en de iepenloft by elkoar 11.000 minsken oanluts. ‘In yntinsive rit dy’t ús troch it hiele seizoen meinaam, mar wat hat it in soad moais brocht. Ferbining mei muzikanten, mei mienskippen én mei nij publyk,’ sa seit artistyk lieder Tatiana Pratley. Nij publyk waard ûnder mear fûn ûnder brûkers fan tagonklike middelen lykas de smart glasses mei ûndertiteling en gebeartetolk, in systeem dêr’t Tryater yn Nederlân mei pionieret. ‘Hjir sette we mei troch, we draaie sûnt Fanfare in twajierrige pilot foar tagonklikens. By de folgjende foarstelling sette we der like stevich op yn.’
Sâlt yn septimber
Nei de simmer stiet Sâlt op it program, in foarstelling fan en mei Tryater-aktrise Eva Meijering mei in tige persoanlike ynstek. It guontiden poëtyske mar faak ek luchtige stik oer opgroeie mei in hûdprobleem smiet yn 2023 hege eagen op Oerol, Skylge. Mei binnen in dei folslein besette plakken en in parse dy’t út ‘e skroeven wie, rôp it Tryater-publyk om mear. Fuortendaliks nei Oerol al, waard besletten it stik te wernimmen. ‘Oerol is geweldich om te stean mar we realisearje ús ek dat in soad fan ús publyk net nei it eilân komt. De reaksjes wiene fantastysk en it hiele stik pakte sa prachtich út dat we drekst besjen woene oft it ek in ferfolch op de wâl krije koe.’ It âld heftruckfabryk fan Alde Leie, no in eventlokaasje, bliek al gau in perfekt plak te wêzen foar it yntrigearjende teäterstik mei in ymposant dekôr fan metershege, stielen oktopuspoaten. ‘We sochten in grutte, hege romte, dy’t ek noch passe moast by it ferhaal. It iepene mar tagelyk benearjende fan in fabrykshal sil Sâlt wer fan in hiel nije diminsje foarsjen.’
Foarstellings en oar oanbod
Nei Sâlt giet Tryater fierder it seizoen yn mei ûnder mear Foekje, in teäterrige fan april oant en mei juny yn gymsealen oer it libben fan hurddraafleginde Foekje Dillema en de jeugdfoarstelling Anwar en de wolf, dy’t fan febrewaris ôf ûnder oare by skoallen delgiet. Wilens stypje we ek jonge makkers mei harren produksjes en biede we râneprogrammearring by ferskate foarstellingen. ‘Sa sil projekt Tryater Rûnom by Sâlt ek wat dwaan omtrint it tema hûd. Mei Rûnom lûke we graach op mei aspirant-skriuwers of spilers bygelyks, wat útrinne kin yn podcasts of oare uteringen.’