Kuierferhalen: kuierje fan iisbanen ôf

By de lokaasjefoarstelling Under Wetter hat Tryater fiif kuiers ûntwikkele dy’t begjinne by in iisbaan yn Fryslân. De rûtes fan sa’n seis kilometer binne te folgjen mei in app, dêr’t ek koarte audioferhalen en doch-opdrachten op stean. De kuiers binne geskikt foar de hiele famylje en ek los fan de foarstelling te dwaan.

De Under Wetter Kuierferhalen starte fan de iisbanen ôf yn Beetstersweach, Berltsum, Holwert, Wergea en Wikel. Rinst de rûtes mei help fan de fergees te downloaden Smart Guide-app. Underweis hearst ferskate koarte ferhalen, dy’t skreaun binne troch skriuwers dy’t har ynspirearje litten hawwe troch de tematyk fan de foarstelling Under Wetter. Dêrneist krijst as kuierder oan de start, healweis en oan de ein in doch-opdracht fan in Under Wetter-akteur. 

Op de webside fan Tryater stean de startlokaasjes fan de kuiers. Hoe’t de app wurket, wurdt by de oanbelangjende iisbanen ek útlein op in startbuordsje, sadat ek spontane kuierders meidwaan kinne oan de Kuierferhalen.  

~ Foto: Berber van Oyen

» Meer lezen? Klik dan hier.