Kick-off Ienakterfestival

24 04 2025

Tryater fiert yn seizoen 2025-2026 syn sechtichjierrich bestean. Ien fan de aktiviteiten is it Ienakterfestival fan 19 o/m 22 maart 2026, as in omkeard jierdeikado oan it Fryske teäterfjild. Ta eare fan it 60-jierrich jubileum ha fiif toanielskriuwers in ienakter skreaun. Sân toanielferienings en twa groepen fan ‘losse’ amateurspilers sille as earste mei de ienakters wurkje.

Kick-off Ienakterfestival | tongersdei 8 maaie by Tryater
In spannende jûn dêr’t njoggen amateurtoaniel groepen te hearren krije mei hokker nije ienakter sy de kommende tiid oan ’e slach gean. De jûn begjint mei skriuwer Wessel de Vries, dy’t ús meinimt yn de wrâld fan de ienakter. Wat makket in ienakter sa bysûnder en wat is it ferskil mei oare toanielfoarmen?

Dêrnei bringe wy de fiif skriuwers foar it fuotljocht: Doutsen van Gosliga, Raymond Muller, Maaike Bergstra, Sanne Schuhmacher en Wessel de Vries. Sy fertelle oer harren ynspiraasjeboarne, hoe’t se ta harren personaazjes kamen en watfoar útdagings se tsjinkamen by it skriuwen fan de stikken. As hichtepunt fan de jûn wurde de skripts útdield en sille de spilers en regisseurs foar it earst in sêne lêze fan it stik dêr’t se mei oan ’e gong sille.

Nei dizze jûn begjinne foar alle groepen de repetysjes. Wy sjogge elkoar wer werom yn it Gouden Wykein op 28 & 29 novimber.

Dielnimmers
De folgjende groepen dogge mei oan it Ienakterfestival:

Toneelgroep Verder út Drachten
De Pionier Theatercreaties út Dokkum – jongeren
De Pionier Theatercreaties út Dokkum – folwoeksenen
Stichting Nut en Genoegen út Easterlittens
Kom mar op! út Suwâld
Theater in de wijk út Ljouwert
Nij Libben út Jellum/Bears
Twa gelegenheidsgroepen fan ‘losse’ amateurspilers yn regy fan Brecht Wassenaar en Alysha Meijboom