Tryater siket ferhalen fan froulju foar Drift

Ynput foar spannende parkeargaraazjefoarstelling fan 2027

Yn 2027 bringt Tryater de spannende parkeargaraazjefoarstelling Drift op de planken, oer de prikeljende ûntdekkingstocht fan in frou op leeftiid. Teätermakker Eva Meijering is foar ynspiraasje op syk nei froulju tusken 50 en 90 jier dy’t mei har yn petear wolle oer harren emosjonele ûntwikkeling fan harren jeugd ôf.

Spanning op De Klanderij
Lokaasjefoarstelling Drift is pland foar de simmer fan 2027 en wurdt spile op in yntrigearjende bûtenlokaasje: op it boppeste dek fan parkeargaraazje De Klanderij yn Ljouwert. De haadrol is foar Joke Tjalsma (68), dy’t op telefyzje te sjen wie yn ûnder oare Oogappels, Bodem, Hertenkamp en Gooische vrouwen en by Tryater earder yn ûnder oare Part-time Paradise spile. Yn maaiejuny 2025 is sy ek de haadfiguer yn Tryater-foarstelling Swimbad yn Bakkefean. Yn Drift sil har personaazje op syk nei spanning, nei gefoelens dy’t se noch net ûntwikkelje kinnen hat.

Fertroulik mei Fryske froulju
Om yn it skript en it makproses in folslein byld te sketsen en it personaazje rjocht te dwaan, hellet teätermakker Eva Meijering graach ynput op by froulju dy’t ek in emosjonele syktocht trochmakken. Meijering, sels aktrise by Tryater (ûnder mear yn Sâlt, de Oerol-hit fan 2023), giet it leafst persoanlik yn petear, fansels fertroulik. Dat kin thús of op in keazen lokaasje. Froulju yn Fryslân tusken 50 en 90 jier wurde oproppen om harren uterlik 21 maart hjirfoar te melden by Eva fia publisiteit@tryater.nl. Dizze nijsgjirrige, leechdrompelige petearen wurde yn de perioade april-juny fierd en leverje ynhâld foar it skript, dêr’t fan de kommende simmer ôf oan wurke wurdt troch priiswinnende skriuwer Frank Siera.

Meijering: ‘Ik meitsje graach persoanlike foarstellingen, dy’t tichteby myn eigen ferhaal en ynteresses steane. In ûnderwerp as dit – it libbensproses dat in frou yn ferskate fazes trochmakket – yntrigearret my. Wat is “drift” foar dy? Hat dat mei lilkens te krijen, of is der ek sensuële drift? Bist wolris op drift slein? Hawwe dizze froulju altyd kontrôle oer harren gefoelens, en wêr sit dat gefoel dan? Is dat oars ast 15, 35 of 55 bist? Ik soe dêr graach oer prate, gewoan as froulju ûnder elkoar en fansels fertroulik; oan ‘e iterstafel of op in oar plak. It moat in goed en bysûnder ferhaal wurde en dêr kinne de froulju fan Fryslân oan bydrage.’