15 oktober: bysûndere edysje fan "Oan Tafel" in Lewinski yn Snits!
10 10 2018
Op moandei 15 oktober e.k. organisearret Tryater mei Lewinski in “Oan Tafel” jûn keppele oan de tematyk fan de nijste teaterfoarstelling Tryater, Doarp Europa.
Tryater hat foar dizze bysûndere edysje fan “Oan Tafel” teatermakkers Eelco Venema en Lourens van den Akker fan HOMSK frege har teatrale fideo-ynstallaasje Us Buorman Yn Tallinn te toanen. Dizze ynstallaasje is boud yn in âlde Katalaanske ambulânse dêr’t se yn de simmer fan 2017 mei nei Tallinn reizgen op syk nei de Europeeske dream. Har ûnderfiningen en it sammele filmmateriaal foarmje de basis foar de ynstallaasjes. Stipe troch visuals fan fideo-artist Frouke ten Velden en muzikant Hilbrandt ûndergiet it publyk in Europeeske dreamtrip. Dizze bysûndere ambulânse sil foar de waskstrjitte stean en de gasten fan “Oan Tafel” kinne yn groepkes fan 7 persoanen nei binnen. Nei ôfrin sille Eelco en Lourens oan tafel oanskowe om nei te praten oer de ynstallaasje en de tematyk Europa, identiteit en takomstdreamen. Fansels dogge we dat mei it hearlike iten fan Barry derby.
moandei 15 oktober e.k.
17.30 – 19.00 o
Fideo-ynstallaasje Us Buorman Yn Tallinn (7 persoanen tagelyk, doer 20 min) by de waskstrjitte
18.00 – 19.30 o
Oan Tafel: ite en petear mei Eelco en Lourens
Sjoch foar mear ynfo www.lewinski.nl / www.homsk.nl
Dizze jûn is ûnderdiel fan it ferdjippingsprogramma fan Doarp Europa. In programma dêr’t Tryater him ferdjippet yn en de ferbining oangiet mei de ynwenners fan de doarpen en stêden fan Fryslân troch moetingen en ynspiraasjemominten te organisearjen. It ferdjippingsprogramma fan Doarp Europa– is mei mooglik makke troch it BankGiro Loterij Fonds.
Doarp Europa is te sjen by lokale bedriuwen mei in ynternasjonale konneksje troch hiel Fryslân: dêr wêr’t wurke wurdt. Dêrneist wurdt de prolooch fertoand yn húskeamers: dêr wêr’t wenne wurdt. Tryater reizget mei dizze kleurrike foarstelling lâns doarpen en stêden yn Fryslân. Dizze meartalige foarstelling makket diel út fan it haadprogramma fan Leeuwarden-Fryslân Kulturele Haadstêd 2018.
Kom, sko oan, op de plakken dêr’t wenne en wurke wurdt en wêr’t de takomst op de wrâld komt!
