Yndrukwekkende earste lêzing Fierder nei it Noarden

Ferline wike tiisdei wie de earste lêzing fan ús nije lokaasjefoarstelling Fierder nei it Noarden. De cast, makkers en de rest fan it Tryater-team kamen yn de kunde mei it ferhaal oer Gabe en syn mem Sunny. Oer in reis nei it Hege Noarden, dy’t einige mei in nacht yn in autogaraazje dy’t Gabe altyd bybleaun is.

Under de lêzing krigen wy in earste yndruk fan de personaazjes, skreaun troch Herman van de Wijdeven. Ek kamen we yn ‘e kunde mei it spul fan de akteurs Tim Helderman, Tamara Schoppert en Mats Voshol ûnder rezjy fan Loek de Bakker. As ôfsluter krigen de oanwêzigen efkes in sneak peek fan de ferskate dissiplinen dy’t belutsen binne by de foarstelling. Scenograaf Sarah Nixon fertelde oer har plannen foar it dekôr- en kostúmûntwerp, Bo van der Ham dielde syn ideeën foar it ljochtûntwerp en Mats Voshol sleat de middei ôf mei in taljochting op de muzyk dy’t er foar de foarstelling makket.

Fierder nei it Noarden is in yntime, muzikale foarstelling oer soarch, leafde en ferantwurdlikheid, oer in bern dat te betiid folwoeksen wurde moast en oer weromkeare om einlik foarút te kinnen. De foarstelling spilet fan 7 oktober o/m 28 novimber yn de wurkpleatsen fan Haaima Service & Auto’s op It Hearrenfean, yn Drachten en Ljouwert. De kaartferkeap is goed op gong en al in kwart fan de kaarten is ferkocht. Wolsto dit net misse? Bestel dan hjir dyn kaarten.